ବାଳକେ ମୋର ବୋଲକର-୧୫

 ପାଖୁଡ଼ା-୧୫

ବାଳକେ ମୋର ବୋଲକର

ଶୁକ୍ରବାର

୦୪/୩/୨୦୨୨

ଆମେ ସାରା ଜୀବନ ଦିନରାତି ଏକ କରି ଧନ ଅର୍ଜ୍ଜନ କରିବାକୁ ଲାଗିଛେ । ଏଥିନିମନ୍ତେ ମିଛ ଖଚ, ଦୁରାଚାର ଭ୍ରଷ୍ଟାଚାର, ହତ୍ୟା ଲୁଣ୍ଠନ ଆଦି କିଛି ବି କରିବାକୁ ପଶ୍ଚାତ୍ ପଦ ହେଉନାହେଁ । ମାନବିକତାକୁ ବିକିବାକୁ ମଧ୍ୟ ପଛୋଉ ନାହେଁ । ତେବେ ମୃତ୍ୟୁ ପରେ ଏହା କିଛି କାମରେ ଲାଗିବ କି? ଏ ସମ୍ପର୍କରେ ଚାଲନ୍ତୁ ଗପଟିଏ ଶୁଣିବା । ଗପଟି ଏହିପରି.......

ସ୍ୱର୍ଗକୁ ବାଟଖର୍ଚ୍ଚ

ଥରେ ଜଣେ ଧନୀଲୋକ କୌଣସି ଏକ ଯାତ୍ରାରେ ବାହାରି ଥିଲେ । ସେ ବାଟରେ ବରଗଛ ତଳେ ଜଣେ ସନ୍ଥଙ୍କୁ ଦେଖିଲେ । ସନ୍ଥ ତାଙ୍କ ଅନୁଗାମୀମାନଙ୍କୁ କିଛି କିଛି ପୁଣ୍ୟ ଅର୍ଜନ କରିବା ପାଇଁ ଉପଦେଶ ଦେଉଥିଲେ । ଧନୀ ଲୋକଟି ପୁଣ୍ୟ ଅର୍ଜନ ନକରି ମୋ ଭଳି ଧନ ଅର୍ଜନ କରିବାର ଆବଶ୍ୟକତା ରହିଛି ବୋଲି ସନ୍ଥଙ୍କୁ କହିଲେ । ସନ୍ଥ ଜଣକ ଧୀର ଓ ଶାନ୍ତ ହୋଇ ସେଇ ଧନୀ ଲୋକଟିକୁ କହିଲେ କି ତୁମ୍ଭେ ସାରା ଜୀବନ ଅର୍ଜନ କରିଥିବା ଧନକୁ ତୁମ ମୃତ୍ୟୁପରେ ସ୍ୱର୍ଗଲୋକକୁ ନେଇ ପାରିବ ନାହିଁ । ତୁମେ ଅର୍ଜିଥିବା ସବୁ ଧନକୁ ଏଇ ମର୍ତ୍ତ୍ୟଲୋକରେ ଛାଡ଼ିକି ଯିବାକୁ ହିଁ ପଡ଼ିବ । ସନ୍ଥଙ୍କ ମୁଖରୁ ଏପରି ବାଣୀ ଶୁଣି ଧନୀଲୋକଟି ବ୍ୟସ୍ତ ହୋଇ ପଡ଼ିଲା ।

ଏମିତି କିଛିଦିନ ବିତିଗଲା । ସେ ସନ୍ଥଙ୍କ କଥା ଭୁଲି ପାରିଲା ନାହିଁ । ଥରେ ସେ ତା’ର ସମସ୍ତ ବନ୍ଧୁବର୍ଗଙ୍କୁ ଡାକି ଏକ ବଡ଼ ସଭା ଓ ଭୋଜିର ଆୟୋଜନ କଲା । ସେଥିରେ ସେ ସେଇ ପ୍ରଶ୍ନଟି ପଚାରିଲା । ପରଲୋକକୁ ମୋ ଅର୍ଜିତ ଧନ କିପରି ଯିବ! ସେଇ ସଭାରେ ତାଙ୍କର ଜଣେ ବିଦେଶି ଫରନ୍ତା ବନ୍ଧୁ ଯୋଗ ଦେଇଥିଲେ । ତାଙ୍କ ପାଖରେ କିଛି ବିଦେଶି ମୁଦ୍ରା ଥିଲା । ସେ ସେଇ ମୁଦ୍ରାଗୁଡ଼ିକୁ ତାଙ୍କର ଧନୀ ବନ୍ଧୁଙ୍କୁ ଦେଇ କହିଲେ-ବନ୍ଧୁ ଏଇ ମୁଦ୍ରା ନେଇ ଆପଣ ପାଖ ଦୋକାନରୁ ମୋ ପାଇଁ କପେ ଚା ମଗାନ୍ତୁ । ତାପରେ ମୁଁ ଆପଣଙ୍କ ପ୍ରଶ୍ନର ଉତ୍ତର ଦେବି । ଧନୀ ଲୋକଟି ମୁଦ୍ରାଗୁଡ଼ିକୁ ଦେଖି କହିଲା । ଏ ମୁଦ୍ରାଗୁଡ଼ିକରେ ଆମ ଦେଶରେ କିଛି ବି କିଣାକିଣି କରିବା ପାଇଁ ଚଳିବ ନାହିଁ। ଏଥିପାଇଁ ଆପଣଙ୍କୁ ବ୍ୟାଙ୍କରୁ ଏ ବିଦେଶୀ ମୁଦ୍ରାସବୁ ଦେଇ ତା’ ବଦଳରେ ଆମ ଦେଶର ମୁଦ୍ରା ନେବାକୁ ପଡ଼ିବ । ବିଦେଶୀ ବନ୍ଧୁ ଜଣକ କହିଲେ ସେହିଭଳି ସ୍ୱର୍ଗଲୋକରେ ପୁଣ୍ୟ ମୁଦ୍ରାର ପ୍ରଚଳନ ରହିଛି । ମର୍ତ୍ୟଲୋକରେ ଅର୍ଜିତ ମୁଦ୍ରାରୁ ସେବା କାର୍ଯ୍ୟ କଲେ ତାହା ସ୍ୱର୍ଗଲୋକରେ ପୁଣ୍ୟ ମୁଦ୍ରାରେ ପରିଣତ ହୋଇଥାଏ । ଖାଲି ସେତିକି ନୁହେଁ ବନ୍ଧୁ ଆପଣଙ୍କ ପାଖରେ ଥିବା ମୂଲ୍ୟବାନ ସମୟ ଓ ବିଦ୍ୟାକୁ ଦାନକରି ସମାଜରେ ସେବାମୂଳକ କାର୍ଯ୍ୟ କଲେ ମଧ୍ୟ ପୁଣ୍ୟ ଅର୍ଜନ କରିହୁଏ । ଯେମିତିକି ଅନାଥ ଅଶ୍ରମ,ଜରାଶ୍ରମ,ପାଖ ଡାକ୍ତରଖାନା ଓ ବିଦ୍ୟାଳୟକୁ ଯାଇ ପିଲା ଓ ରୋଗୀମାନଙ୍କ ଆବଶ୍ୟକତାକୁ ପୂରଣ କରିବା, ଅସହାୟକୁ ସାହାଯ୍ୟ କରିବା, ସମସ୍ତଙ୍କ ମୁହଁରେ ହସ ଫୁଟେଇବା ଇତ୍ୟାଦି ।

ବିଦେଶୀ ବନ୍ଧୁଙ୍କ ଉତ୍ତରରେ ଧନୀଲୋକଟିର ଆଖି ଖୋଲିଗଲା । ସେ ସନ୍ଥ ଓ ଗୁରୁଜନଙ୍କ ଶରଣାପନ୍ନ ହୋଇ ଏହିସବୁ ପୁଣ୍ୟକାର୍ଯ୍ୟରେ ମନ ନିବେଶ କଲା ।