ବାଳକେ ମୋର ବୋଲକର-୯

 ପାଖୁଡ଼ା-୦୯

ବାଳକେ ମୋର ବୋଲକର

ଗୁରୁବାର

୧୭/୨/୨୦୨୨

    ଜଣେ ବ୍ୟକ୍ତି କୋଣସି କାର୍ଯ୍ୟ କଲା ବେଳେ ବା ବିଦ୍ୟାର୍ଥୀଟିଏ ପାଠ ପଢ଼ିବା ବେଳେ ମନକୁ ଉକ୍ତ କାର୍ଯ୍ୟ ବା ପାଠରେ ଲଗାଇବାକୁ କୁହାଯାଏ । ମନର ବୃତ୍ତି ହେଲା ବୁଲିବା । ଆଖି ଚାହିଁଥିବ, ହାତ ଲେଖୁଥିବ କିନ୍ତୁ ମନ ସାରା ସଂସାର ବୁଲି ଆସୁଥିବ । ତେବେ ପାଠ କାନରେ ପଶୁଥିବ କିନ୍ତୁ ଅନ୍ୟ କାନରେ ବାହାରି ଯାଉଥିବ । ପିଲାଟି ପଢ଼ିଲା ପଢ଼ିଲା ପରି ଜଣା ପଡ଼ୁଥିବ କିନ୍ତୁ କିଛି ପଢ଼ୁ ନଥିବ ବା ଶୁଣିଲା ଶୁଣିଲା ପରି ହେଉଥିବ କିନ୍ତୁ କିଛି ଶୁଣୁ ନ ଥିବ । ତା ଶରୀରର ଅଙ୍ଗଭଙ୍ଗି କିନ୍ତୁ ତାହାର ଏ କାର୍ଯ୍ୟକୁ ଧରାପକେଇ ଦିଏ । ତାର ଅଜଣାରେ ତାର ଗୋଡ଼, ପାଦ, ମୁଣ୍ଡ ବା ସାରା ଶରୀର ହଲିବାକୁ ଆରମ୍ଭ କରେ । ଏହି ଶରୀର ହଲିବା ଭାଷାରୁ ତା ଅନ୍ତର୍ମନର ଭାଷା ପଦାକୁ ଆସେ । ଯାହାକୁ ଧରି ତାର ମନକୁ ଏକାଗ୍ର କରେଇବାକୁ ପଡ଼ିଥାଏ । ସେ ସମ୍ପର୍କରେ ଚାଲ ଗପଟିଏ ଶୁଣିବା । ଗପଟି ଏହିପରି.......

ମନଯୋଗ

    ଜଣେ ସାଧୁଙ୍କ ପାଖକୁ ଜଣେ ଯୁବକ ଆସି କହିଲା ଯେ ସେ ତାଙ୍କ ଠାରୁ ଶିଷ୍ୟତ୍ୱ ଗ୍ରହଣ କରିବାକୁ ଚାହେଁ । ସାଧୁ କହିଲେ ବାବା ଧିରସ୍ଥିର ହୋଇ ବସ । ମୁଁ ଯାହା କହୁଛି ତାକୁ ଧ୍ୟାନର ସହ ଚୁପ୍‌ଚାପ୍ ଶୁଣ । ଏହା କହି ସାଧୁ ସମବେତ ଶ୍ରଦ୍ଧାଳୁ ମାନଙ୍କୁ କିଛି କହିବାକୁ ଲାଗିଲେ । ଯୁବକଟି ସବୁ ଶୁଣୁଥାଏ । ହେଲେ କିଛି ସମୟ ପରେ ତାର ପାଦ ହଲୁଥିବା ଦେଖିବାକୁ ମିଳିଲା । ସାଧୁ ତା’ର ପାଦ ହଲୁଥିବା ଦେଖି ତା ପାଦ ଆଡ଼କୁ ତୀକ୍ଷ୍ଣ ଦୃଷ୍ଟିରେ ଚାହିଁଲେ । ଫଳରେ ଯୁବକ ପ୍ରକୃତିସ୍ଥ ହୋଇ ସ୍ଥିର ହୋଇ ବସିଲା । ତାର ପାଦ ହଲିବା ବନ୍ଦ ହୋଇଗଲା । ସାଧୁ ପୁଣି କହିବାକୁ ଆରମ୍ଭ କଲେ । କିଛି ସମୟ ପରେ ଯୁବକର ପାଦ ପୁଣି ହଲିବାକୁ ଲାଗିଲା । ସାଧୁ ପୁଣି ପାଦ ଆଡ଼କୁ ତୀକ୍ଷ୍ଣ ଦୃଷ୍ଟିରେ ଚାହିଁ ରହିବାରୁ ଯୁବକ ପୁଣି ପ୍ରକୃତିସ୍ଥ ହୋଇଗଲା । ସାଧୁ କହିଲେ, ତୁମେ ପାଦ ହଲାଉଛ କାହିଁକି? ଯୁବକ କହିଲା , ମୁଁ ଜାଣି ପାରୁ ନାହିଁ କେତେବେଳେ ପାଦ ହଲାଇ ଦେଉଛି । ମୁଁ ଆପଣଙ୍କ କଥା ମନଧ୍ୟାନ ଦେଇ ଶୁଣୁଥିବା ବେଳେ ପାଦ ଆପଣାଛାଏଁ ହଲୁଛି ।

    ସାଧୁ କହିଲେ, ପାଦ ତୁମର, ଅଥଚ ପାଦ କେତେବେଳେ ହଲି ଯାଉଛି ତୁମେ ନିଜେ ଜାଣିପାରୁନାହଁ? ତାହା ହେଲେ ତ ବିଷମ ସମସ୍ୟା । ତୁମ ହାତ କେତେବେଳେ ଅଜାଣତରେ କାହାର କିଛି କ୍ଷତି କରିଦେବ ଅଥଚ ତୁମେ ଜାଣି ନ ଥିବ! ଯୁବକ ଚୁପ୍ ରହିଲା । ସାଧୁ ପୁଣି କହିଲେ, ଏଥି ଲାଗି ତୁମକୁ ସର୍ବଦା ଜାଗ୍ରତ ରହିବାକୁ ହେବ । ତୁମ ପାଦ ହଲୁଛି ଅଥଚ ତୁମେ ଜାଣିପାରୁ ନାହଁ ମାନେ ତୁମର ଚୈତନ୍ୟର ଗୋଟିଏ ଅଂଶ ଶୋଇଛି । ଏବେ ଠାରୁ କେବଳ ସେତିକି ଅଭ୍ୟାସ କର, ଯେମିତି ତୁମେ ଯାହା ବି କରିବ ସେ ନେଇ ସଚେତ ରହିବ । ଯେ ପର୍ଯ୍ୟନ୍ତ ଶୋଇ ନାହଁ, ସେ ପର୍ଯ୍ୟନ୍ତ ତୁମର ସମସ୍ତ ଶରୀର ଓ ମନ ଚେଇଁ ରହିଥାଉ ।

    କାର୍ଯ୍ୟ ସହ ମନର ସଂଯୋଗ ହିଁ ଯୋଗ । କାର୍ଯ୍ୟ ସହ ମନର ସଂଯୋଗ ନ ହେଲେ ଶରୀରର ସମସ୍ତ ଅଙ୍ଗ ଏକାଗ୍ର ହେବ ନାହିଁ କି ଯାହା କରୁଛ ତାକୁ ମନଯୋଗ ସହକାରେ ଜଣେ କରିପାରିବ ନାହିଁ । ଏଣୁ ଜାଗତିଆର ହେବାକୁ ହେବ ।