ବାଳକେ ମୋର ବୋଲକର-୮

 ପାଖୁଡ଼ା-୦୮

ବାଳକେ ମୋର ବୋଲକର

ବୁଧବାର

୧୬/୨/୨୦୨୨

    ସତ ଏପରି ଏକ ଶବ୍ଦ ଯାହା ସମସ୍ତେ ସମସ୍ତଙ୍କ ଠାରୁ ଆଶା କରନ୍ତି । କିନ୍ତୁ ଏ ଶବ୍ଦକୁ ନିଜେ ନିଜର ସୁବିଧା ଅନୁସାରେ ବ୍ୟବହାର କରନ୍ତି । ସତ ମଧ୍ୟ ଏକ ଆପେକ୍ଷିକ ଶବ୍ଦ ବୋଲି ବି ଅନୁଭବରୁ ଜଣା ପଡ଼େ । ଜଣକ ପାଇଁ ଯାହା ସତ ସେହି ଏକା କଥା ଅନ୍ୟ ଜଣକ ପାଇଁ ମିଥ୍ୟା ସାବିତ ହୋଇ ପାରେ । ସତକୁ ଆଧାର କରି କୋର୍ଟ କଚେରିରେ ବିଚାରକ ମାନେ ନିଜର ନିଷ୍ପତ୍ତି ଶୁଣାଇ ଦୋଷୀ ବା ନିର୍ଦ୍ଦୋଷ ସାବ୍ୟସ୍ତ କରି ଦଣ୍ଡ ବା ପୁରସ୍କାରର ବ୍ୟବସ୍ଥା କରନ୍ତି । କିନ୍ତୁ ବେଳେ ବେଳେ ଦେଖାଯାଏ ମିଥ୍ୟାବାଦୀ ସପକ୍ଷରେ କୋର୍ଟର ରାୟ ଯାଇଛି । ସେଥିପାଇଁ ସତକୁ ମିଛ କରୁଥିବା ପାଇଁ ଓକିଲଟିଏ ନିନ୍ଦିତ ହୁଏ । ତେବେ ଏଠି ଗୋଟିଏ କଥା ମନକୁ ଆସେ ସର୍ବଦା ସତ୍ୟ କହି କ’ଣ ଆଜିକାଲିର ସଂସାରରେ ଚଳି ହେବ? ସେ ସମ୍ପର୍କରେ ଚାଲ ଗପଟିଏ ଶୁଣିବା । ଗପଟି ଏହିପରି.......

ସବୁଠାରୁ କଷ୍ଟ କାମ

    ଜଣେ ଗୁରୁ ତାଙ୍କ ଶିଷ୍ୟକୁ ଦୀକ୍ଷାନ୍ତ ଉପଦେଶରେ କହିଲେ-ପ୍ରତିଜ୍ଞା କର, ତୁ ସଦାଦେଳେ ସତ କହିବୁ । ଶିଷ୍ୟ ତାହା ମାନିବ ବୋଲି ପ୍ରତିଶୃତି ଦେଇ ଆଶ୍ରମ ଛାଡ଼ିଲା । ଅନେକ ବର୍ଷ ପରେ ଶିଷ୍ୟଟି ସହିତ ଗୁରୁଙ୍କର ଦେଖା ହେଲା । କିଛି ସମୟ କଥା ହେବା ପରେ ଗୁରୁ ପଚାରିଲେ-ତୁ ମୋର ଶେଷ ଉପଦେଶ କନେ ରଖିଛୁ ତ? ଶିଷ୍ୟ କହିଲା-ମୁଁ ମନେ ରଖିଛି ଏବଂ ତାକୁ ଅକ୍ଷରେ ଅକ୍ଷରେ ପଳନ ମଧ୍ୟ କରୁଛି । କିନ୍ତୁ ସେଇ ଅନୁଭୁତି ମୋର ଏକ ଜ୍ଞାନୋଦୟ ବି କରିଛି । ଗୁରୁ ପଚାରିଲେ- କିଭଳି ଜ୍ଞାନୋଦୟ? ଶିଷ୍ୟ କହିଲା-ମୁଁ ପ୍ରଥମେ ଭାବି ନେଇଥିଲି ଯେ ସର୍ବଦା ସତ କହିବା ବିଶେଷ କଷ୍ଟକର ନୁହେଁ । ମୁଁ ଭାବି ଦେଇଥିଲି ଯେ ସତ କହିବା ଲାଗି ତ ଭଗବାନ ଆମକୁ ଜିହ୍ୱାଟି ଦେଇଛନ୍ତି କିନ୍ତୁ ବାସ୍ତବରେ ଦେଖିଲି ସତ ଶୁଣି ସହି ପାରିବା ଭଳି କାନ ଓ ମନ ଭଗବାନ ଦେଇ ନାହାନ୍ତି । ତେଣୁ ସର୍ବଦା ସତ କହିବା ଏଭଳି ଜଟିଳ ପରିସ୍ଥିତି ସୃଷ୍ଟି କରିଛି ଯେ କହିଲେ ନ ସରେ । ଗୁରୁ କହିଲେ-ତାହା ହେଲେ ତୁ କ’ଣ କଲୁ? ଶିଷ୍ୟ ଉତ୍ତରରେ କହିଲା ଗୋଟିଏ କାମ କଲି, ଯେତେବେଳେ ମିଛ କହିବାକୁ ପଡ଼ିଲା ମୁଁ ନିରବ ରହିଲି । ଏବେ ଦେଖୁଛି ଯେ ଅଧିକାଂଶ ସମୟ ମୌନ ହିଁ ରହୁଛି । ଗୁରୁ କହିଲେ- ଠିକ୍ କହିଲୁ । ସତ କହିବା ହେଉଛି ଏ ପୃଥିବୀରେ ସବୁଠାରୁ କଷ୍ଟକର କାମ ।

    ଏଣୁ ଜଣେ ପାରିପାଶ୍ୱିର୍କ ଅବସ୍ଥାକୁ ଦେଖି ବ୍ୟବହାର କଲେ ସର୍ବଦା ସତ କହି ଚଳିପାରିବ । କିନ୍ତୁ ସର୍ବଦା ମିଥ୍ୟା କହି ଚଳିବା ସମ୍ଭବ ନୁହେଁ।

ପ୍ରସ୍ତୁତି-ସୁରେଶ ଚନ୍ଦ୍ର ବରାଦ